Title: "Biakinn Puanzar Cheu (2) ah aa Cheu"(Curtain has been Torn)

Chun suimilam hleihnih tluk ah ni cu a mui i muihnak nih ram cu a pumpuluk in zanlei suimilam pathum tiang a khuh; cun Biakinn chung puanzar kha cheu hnih ah aa cheu (Luka 23: 44-45)

Baibal Cahlun chung lio bantukin nang le kei caah tlangbawi pakhat nih kumkhat voikhat sual ngaihthiamnak caah raithawi piak lengmang a herh ti lo. Judah le Gentile, bawi le sal ti thleidannak a um ti lo. Pa lungtawnnak ah minung phungphai a herh tilo. Kan sualnak vialte zungzal ngaihthiam a si cang. Kanmah tein ka Pa tiah auh khawhnak nawl kan ngei cang. Khuaruahhar tukmi le a sunglawi mi sinak a co cangmi kan si. Bawipa cungah i lawm zungzal usih.
Amen

 

Title: "Misual a Cohlangtu i Ngaithiam Tu" (Jesus Accepts Sinners)

Jesuh pawng misual pahnih hna lakah pakhat nihcun Jesuh kha a mawhchiat. Asinain a dang pakhat deuh tu nihcun Jesuh Siangpahrang sinak theih in hitihin a ti:

“Jesuh, Siangpahrang in na rat tikah ka philh te hlah,” tiah a ti. 43 Cun Jesuh nih cun, “Mah hihi kan chimh: nihin ah Paradis ah keimah sinah na um lai,” a ti (Luka 23:42-43).

Jesuh cu misual hna cohlangtu a si. Misual dawtu a si. Cohlangtu a sinak le misual dawtu a sinak tiang lawng ahkhan ngaihthiamnak taktak kha a phan lo. Asinain sual aa ngai chih i amah sinah aa mermi lawng kha a ngaihthiam. Misual cohlangtu a si, ngaithiam tu a si ti tiang lawng siloin thinlung takin sual a ngaichih i Jesuh sin a kirmi si hna usih.
Amen

 

Title: "Zultu Nun, Ngaihthiam Nun"(Forgiveness)

Jesuh nih aa thawh i, “Ka Pa, ngaithiam hna. An tuahmi hi zei a si ti awk an hngal lo,” tiah a ti (Luka 23:34).

Lu ruh tlang ah Jesuh he khenh chihmi misual pahnih hna khi Jesuh nih a theihmi an si lem lai lo. Asinain Jesuh nih, "KA PA, NGAITHIAM HNA" tiah thla a campiak hna. Hi nih a kan cawnpiakmi cu mi zeipaoh cungah ngaihthiam nun ngeih ding kha a si. Khrih nun a cawng i ngaihthiam nun a ngei zungzal mi kan si khawhnak hnga Bawipa nih a biatawi thluachuah pe ko seh.
Amen

 

Title: "Nanmah le Nan Fale Ca Tu ah Tap Deuh U a Ti" (Women, Do Not Cry for Me)

Jesuh nih annih kha a merhnawh hna i, “Jerusalem minu hna, keimah caah tap hlah u; nanmah le nan fale ca tu ah tap deuh u..." (Luka 23:28).

Jesuh nih "NANMAH" le "NAN FALE" ca tu ah tap deuh u a ti duhnak zeidah a si? An sualnak an i ngaihchih i Pathian biatak an theih ding tu kha a chim duhmi a si. Cu bantuk in kanmah hrimhrim nih, kan fale le kan miphun nih Pathian lei ah a mer i Pathian biatak a thei mi kan si khawhnak hnga a biatawi thluachuah pe ko seh.
Amen

 

Title: "Intuar Khawhnak Khrih Lungput"(Jesus has Patience)

Jesuh cu a cawngtu hna nih khan nihchuak ah an saih. An tuk, a mit an huh i, “Ahodah an tu? Kan chim tuah,” tiah an ti chih. Jesuh cuticun nihsawhnak bia kha a cungah tampi an chim (Luka 22:63-65).

Hitluk in an serhsat, an zawmhtaih, an tuk nain dai tein thih tiang Pa nawl kha a zulh. Nifatin te kan nunnak ah Khrih nunzia intuar khawhnak a ngei mi kan si khawhnak hnga a biatawi thluachuah pe ko seh.
Amen

 

Title: "Thlacam a Kan Cawnpiak" (Jesus Submits to the Father`s Will)

(Luka 22:42)
Cun an sin khan lungchep tluk a va kal i a khuk aa bil i thla a cam. “Ka Pa, na hna a tlak ahcun hi hrai hi ka thialpiak ko. Sihmanhsehlaw keimah nawl si loin nangmah nawl si ko seh,” tiah a ti.

A cungah kan rel bantukin Jesuh nih thlacam dan phun (2)) a kan cawnpiak:
* Khukbil in thlacam le
* amah duhnak chimh ko nain Pa duhnak ah nun i thumh kha a si.

Bawipa hmai ah khuk bil in thla a cam zungzal mi le Pa duhnak ah nun aa thumhmi kan si khawhnak hnga a biatawi thluachuah pe ko seh.
Amen

 

Title: "Tukforhnak Chung Ka Tlak Sualnak Hnga Lo" (So That You Will Not Fall into Temptation)

Zumtu paoh nih theih a herhmi thil pakhat a um. Cucu ka umnak paoh, ka kalnak paoh, ka ruahmi paoh, ka tuahmi paoh, ka chimmi paoh, ka ngaimi paoh, ka zohmi paoh etc...ah tukforhnak ah ka thla kho ti hi philh hlah usih. Cucaah EVERY STEP kan i ralrin a herh i thla kan cam a herh. Jesuh Oliv Tlang ah a kal i a zultu kha a sinah an kal ve. A hmun kha a phak tikah annih cu a thawh hna i,

“Tukforhnak chungah nan tlak sual nakhnga lo thlacam tuah u,” a ti hna (Luka 22:40)

Tukforhnak ah kan tlak sual nak hngalo thlacam zungzal ko hna usih. Abia tawi Bawipa nih thluachuah pe ko seh.
Amen

 

Title: "Ahodah a Ngan Bik" (Who is the greatest?)

Zultu hna lak zongah hin thutdan duh, minthat duh le Jesuh Judah siangpahrang a si tikah hmunhma tha co duh ruangah zultu hna lakah ahodah a nganbik timi kong bia alnak a rak chuak (Luka 22:24). Jesuh an hal tikah a lehmi hna cu,

"Sihmanhsehlaw nannih cu hitihin nan si awk a si lo: nan lak i a ngan bik kha a ngakchia bik bantuk a si awk a si i hruaitu a simi kha sal bantuk a si awk a si" (Luka 22:26).

Hihi zumtu, hruaitu tampi nih nunzia kan rak thiam tawn lomi a si. Kha lio caan i zultu hna nih an buaipi mi ah a buaimi siloin Khrih lungput a ngei i tha tein Jesuh cawnpiak ning a zul khomi kan si khawhnak hnga a biatawi thluachuah pe ko seh.
Amen

 

Title: "Zumhnak hi Kaa in Chim Sawhmi a Si Lo" (Faith is Not just by Mouth)

Jesuh nih Simon, "Na zumhnak a pur nak hnga lo na caah thla ka cam" (Luka 22:32) tiah a ti tikah Peter nih a leh i, “Bawipa, nangmah he thongtlak le thih kha ka ngamh ko,” tiah a ti (Luka 22:33).

Kan Bawipa Jesuh Kross lam a vun phak taktak hlan ahcun Peter cu a ral a tha taktak. Fawi tein thongtlak zong ka ngamh, thih zong ka ngamh tiah a chim. Asinain kan Bawipa Jesuh Kross lam (hremnak lam) a vun phak taktak tikah voi (3) tiang hipa cu ka hngal lo a ti. Zultu tha a sinak QUALITY a tlau ai. Zultu Quality cu harnak caan ahhin a rak lang tawn.

Peter bantukin kan silonak pi kha Kaa in a chim sawhsawh mi siloin kan thinlung chung i kan zumh ning deuh tu khan a chimmi, a nungmi kan si khawhnak hnga Bawipa nih a biatawi thluachuah pe ko seh.
Amen

 

Title: "Ka Pathian cu Ka Thangthat Than Lai" (I Will yet Praise Him)

Vawlei nih a chuah pimi ral le rai ruangah mi tampi nih harsatnak kan tong i a fak bikmi thihlohnak hna kan tawn tikah hin kan nunnak hi muihnak nih a khuh dih i micheu caah cun Salm Catialtu pa nih, "Chun nitlak zan khuadei in ka tap i ka mitthli lawng kha ka rawl cu a si ko;..." (Salm 42:3) a timi hi kan si taktak ko. Zeitindah kan nun kun lai?

Salm Catialtu pa cu a mitthli le a ttahnak nih a nun khuh peng ding kha a duh lo caah a biapi tukmi biachahnak pakhat a tuah. A timi cu,
"Zeicahdah ka ngaih a chiat?
Zeicahdah ka lungre a theih?
Pathian cu kaa bochan than lai i
ka Khamhtu le ka Pathian cu
ka thangtha than lai" (Salm 42:5,11).

Kan ttah ding a si ko. Kan mitthli luan ding a si ko. Kan ngaih a chiat ding a si lo. Kan lilen ding a si ko. Asinain kha nih na nun uk peng hlah seh. Satan pa caantha pe hlah! Pathian bia nih ruahchannak a ngei lomi bantuk si hlah u a kan ti (1 Thes. 4:13). Vawlei cung nunnak pinah a sunglawi tukmi sinak, zungzal nunnak a ngeimi kan si. Cucu kan i ruahchanmi cu a si. Harsatnak, thihlohnak le ngaihchiatnak na tong maw? Zei biachahnak dah na tuah ve lai? Salm Catialtu pa nih cun 'ka Khamhtu KA PATHIAN CU KA THANGTHAT THAN LAI' tiah a ti. Amen! Bawipa a thangthat than mi kan si khawhnak hnga a biatawi thluachuah pe ko seh.
Amen

Title: "Chimh Loawk Thalo Jesuh" (Tell Jesus)

"Ka harnak vialte kha amah ka chimh dih i ka retheihnak vialte kha ka hngalhter" (Salm 142:2)

Harnak na tong maw? Lung retheihnak na tong maw? Na lung a dong maw? Ahodah na chimh lai? Nu le pa unau, hawikom dawt kan chimh hna tikah ruahnak tha le, thazang zong tampi an kan pek ve. Asinain kan tawnmi vialte a kan theihpiak lawng siloin kan reitheihnak le kan harsatnak chungin chuah khotu taktak cu Bawipa lawng a si. Chimh loawk a tha lomi cu Jesuh lawng a si. Kan tawnmi paoh ah amah ngalhter in chim zungzal ko hna usih. A biatawi thluachuah pe ko seh.
Amen

 

Title: "Kan Nunnak Taktak cu..." (Living as Those Made Alive in Christ)

"Nan nunnak taktak cu Khrih kha a si i amah cu a langh tikah nannih zong amah sinah cun nan lang ve lai i a sunparnak cu nan i hrawm lai" (Kol. 3:4).

Paul nih V,1 ah "NAN NIH" timi le V,4 ah "NAN NUN" timi biafang a hman. Hi a tial duhnak a ruang cu Khrih Thawngtha a co cangmi hna, thawhthan nun a ngei cang mi hna kha a chim duhnak a si. Cu hnu ah Paul nih a pehthanmi cu,

"Hi vawlei cung thil hi si loin khika thil tu kha ruat hna u" (v,2).

Kan nunnak taktak cu Khrih a si cang Thawhthan nun a ngei cangmi kan si. Nifatin kan ruat bikmi, kan nun a kan hruai biktu thil zeidah a si? A biatawi Bawipa nih thluachuah pe ko seh.
Amen

 

Title: "Mifim nih Nun Chimh a Duh"(The Wise Listens and Accepts)

Zumtu pakhat nih kan fim le fim lo kan nun kan i Check duh tikah siseh, midang nun kan zoh tikah siseh Pathian bia in zoh le nun i tah lengmang hi a rak biapi tuk.

"Miruamkai cu nun chim hlah, an huat sual lai, mifim cu nun chim law an dawt lai" (Phungtb. 9:8).

Midang nih nun chimh khawh tilomi kan si sualnak hnga lo le midang nih chim tikah Bawipa duhnak zeidah a si tiah tangdor tein a nungmi kan si khawhnak hnga a bia tawi thluachuah pe hram ko seh.
Amen

Vernetzt im Bund Evangelisch-Freikirchlicher Gemeinden (BEFG) in Deutschland K.d.ö.R.

Wir sind Mitglied im Bund Evangelisch Freikirchlicher Gemeinden in Deutschland K.d.ö.R.



Interview mit Martin Seydlitz

Mit unserem neuen Referenten des Landesverbandes, Pastor Martin Seydlitz - das neue Gesicht des Landesverbandes, haben wir ein Interview zu seiner Einstellung zum 01.08.2022 geführt. Martin Seydlitz  Das Interview kann hier eingesehen werden: {jd_file file==387}.

28.04.2022


Glaube und Taufe

Dieser Abschnitt der Rechenschaft vom Glauben gilt mit der Taufe dem Herzstück baptistischen Selbstverständnisses..

26.06.2022

Ukraine-Hilfe europäischer Baptisten geht unvermindert weiter

Die Hilfe der EBF und ihrer Mitgliedsbünde für ukrainische Geflüchtete geht unvermindert weiter. Der BEFG unterstützt die Arbeit seiner Partner und organisiert eigene Hilfstransporte..

16.06.2022